انا جعان. هناكل ايه. معرفش بس انا جعان. طب فيه اكل في التلاجة؟ لا ما فيش و مش هطبخ. طب نطلب؟! نطلب ايه؟؟!!, دور على منيو الراجل بتاع الفطير اللي على اول الشارع. مش لاقيه !! طب انا جعان!!.
اكيد الحوار ده دار بينك و بين صاحبك, مراتك, او كرشك قبل كده. و يفضل يتكرر و تفتح التلاجة 10 مرات. و التلاجة تقلك اقفل اقفل مفيش حاجة. و يا اما تنام جعان يا اما تطلب من بتاع الفطير و انت ما بتحبوش علشان معندكش غير المنيو بتاعه.
هيييحح, المهم startupsgalaxy.com جابتلك الحل. بص هو مش حل واحد هم اربعة, 4 مواقع هتجاوبك على السؤال الوجودي بتاع هتاكل ايه.
Otlob.com
اطلب ابتدى بمجلة فيها كل منيوهات المطاعم في القاهرة, و اتطور كذا مرة لحاد ما وصل دلوقتي انك ممكن تطلب من الموقع علطول من غير ما تواجه الالم و الاحباط اللي هيجيلك من مكالمة مسئول الدليفري في المطعم.
اهم المميزات:
- مجال واسع من المطاعم في منطقتك هيخليك ما تحتارش و تلاقي الاكل اللي نفسك فيه بالظبط.
- تقدر تفلتر بنوع الاكل اللي نفسك فيه بالظبط.
- بتدخل عنوانك مرة واحدة بس و كل اللي عليك بعد كدة انك تنقي الاكل اللي انت عاوزة و هيجيلك لحاد البيت.
- اول ما تطلب بيشتغل تراكر يقلك الاوردر بتاعك وصل فين و فاضل وقت قد ايه لحاد ما يوصلك.
شوف معلومات اكتر عن اطلب من هنا
Elmenus.com
المنيوز ده مثلا من احلى الحاجات في حياتي. فيسبوك للاكل. اول ما تدخل الويب سايت تلاقيه مرحب بيك بصور من كل ما لذ و طاب في شكل تايم لاين ده غير مميزات تانية زي:
- في المينيوز مش هتقدر تطلب من الابليكيشن علطول زي اطلب. بس هتلاقي كل منيوهات المطاعم متصورة و ارقام الدليفري بتاعهم.
- الريفيوز واخدة وضعها في المينيوز و موجودة بشكل اكبر
- بكتير من كل المواقع التانية.
- الكريزة بقى انك بتفلتر المطاعم بمودك, مودك مذاكرة ولا اجازة ولا انتخة في البيت. هتلاقي مطاعم مناسبة لمودك.
- ممكن كمان تفلتر بنوع الاكل. هتلاقي حاجات غريبة. يعني مثلا اول مرة اعرف ان فيه مطاعم استرالي في مصر.
شوف معلومات اكتر من هنا
Yumamia
لما Yumamia بيقول انهم بيعملوا اكل بيت فهم قاصدين ده حرفيا. Yumamia مختاره مجموعة من الامهات و ستات البيوت اللي ايديهم تتلف في حرير. و كل واحدة بتقدم منيو تقدر تختار اللي انت عاوزة من كل الخيرات البيتي. دي اهم مميزاته:
- Yumamia بيركزوا اكتر على الاكل الصحي, و بيقدموا نفسهم على انهم البديل الصحي لل junkfood
- مهما كان انت ساكن فين كل منطقة ليها منيو مرتبط بستات البيوت القريبين منك.
- تنوع كبير في المنيو و انواع الاكل.
- بتقدر تختار اذا كنت عاوز لفرد واحد ولا عائلي, لما بيبقى عائلي بيجيبلك صينية حلوة كده تعوم فيها انت و اصحابك.
شوف معلومات اكتر عنهم من هنا
mumm
شبه YUMAMIA في حاجات كتير.يعني برضه بيوصلك بستات بيوت بيعملوا اكل بيتي. الفرق بس ان mumm مصري اكترمن ناحية نوع الاكل. يعني بتحس انك جو سفرة تقيلة في عزومة محترمة معمولة لاكيلة بجد. و اهم مميزاته هي:
- بالاضافة للاكل الجاهز, mumm بيقدم احجام كبيرة للعزومات و كمان اكل مجمد نص سواء لستات البيوت اللي بتشتغل.
- ممكن تاكل ببلاش حرفيا لو خليت واحد صاحبك يعمل اوردر.
- مفيد جدا لو في الشغل و عاوز تطلب اكلة محترمة.
شوف معلومات اكتر عنهم من هنا
انا جعت قوي و انا بكتب البوست دي بصراحة. و ما كنتش متخيل كمية الاختيارات اللي موجودة لما قررت استخدم التكنولوجليا و الشركات الناشئة. startupsgalaxy.com مليانة حلول لكل حاجة في حياتنا بتقدمها الشركات الناشئة. اروح انا بقى اشوف صينية المكرونة بالبشاميل اللي على mumm دي بتتكلم عن ايه. اهههه…
ما تنساش تسجل ايميلك علشان يجيلك اخر حلول بتقدمها الشركات الناشئة اول بأول.
