إنت صاحب شركة؟
لو أنت رائد أعمال أو صاحب شركة وبتواجهك تحديات في إدارة مشروعات شركتك أو منشأتك وعايز تنظم شغلك وتكون على علم دايمًا بسير مهام الفريق من غير ما تحتاج لمتابعة كل حاجة بالتليفون وتتصل بكل فرد في فريقك عشان تعرف هما وصلوا لفين وتوفر وقت وجهد، جرب أبليكيشن “تريلو” Trello.
إيه فكرة الأبليكيشن؟
“تريلو” هو برنامج لإدارة المشروعات وتنظيم المهام بين أفراد الفريق بأسلوب سهل وبسيط، وتقدر تستخدمه على اللابتوب أو الموبايل (Android, IOS). يعني هتتابع شغلك حتى لو كنت برة شركتك أو مسافر؛ مفيش حاجة هتفوتك ☺
أبدأ إزاي؟
1
هتعمل حساب جديد على اللينك ده https://trello.com/home
أو ممكن تستخدم الأكاونت بتاعك على جوجل. بمجرد ما تعمل log in أو تسجيل دخول هتلاقي قدامك شاشة زي دي (شاشة رقم 1).
(شاشة رقم 1)
2
فكرة البرنامج قايمة على الboards بحيث إنك تخصص board لكل مشروع مثلاً وتسميها باسم المشروع. زي ما هو واضح في شاشة رقم 1، تقدر تعمل board جديد عن طريق الضغط على Create new board أو علامة الزائد الموجودة فوق على اليمين. بعد كدة هتحدد Board Title (اسم المشروع) والخصوصية (Private or Public).
ده شكل الboard بتاعك (شاشة رقم 2) وبيتكون من مجموعة من القوائم أو Lists (عناوين القوائم دي البرنامج مقسمها ل To Do|Doing|Done تقدر تغيرها بالضغط عليها وكتابة عنوان مختلف حسب الworkflow في شركتك)، وممكن تضيف قايمة جديدة بالضغط على Add another list .
(شاشة رقم 2)
3
كل قايمة تقدر تضيفلها مجموعة من الكروت أو cards بالضغط على Add a card؛ بحيث إن كل card منهم تمثل مهمة أو تاسك في المشروع.
ده شكل الboard بعد إضافة card جديدة لكل تاسك (شاشة رقم 3).
(شاشة رقم 3)
4
تقدر تنقل ال cards بسهولة من list للتانية بإنك تسحبهم بالماوس وتنقلهم بحسب إيه إللى خلصته (Done) وإيه لسه شغال عليه (Doing).
عايز أضيف الفريق بتاعي، أعمل إيه؟
هتدوس على Invite الموجودة في الشاشة من فوق (شاشة رقم 4) وتكتب إيميل الشخص أو الأشخاص إللي هيشتغلوا معاك وبعدها تضغط على send invitation . ممكن تختارcreate link وتبعتلهم لينك يقدروا عن طريقه يشاركوا في المشروع.
(شاشة رقم 4)
5
لما تضغط على أي card عندك هيظهرلك box عشان تضيف تفاصيل أكتر عن التاسك (شاشة رقم 5) زي الوصف Description وممكن أي شخص يضيف تعليق عن طريق Add Comment، وممكن كمان تحدد معاد لنهاية التاسك Due Date دة غير خيارات تانية كتير.
(شاشة رقم 5)
كل الحاجات إللي اتكلمنا فيها تقدر تعملها بالنسخة المجانية، ولو عايز تعرف أكتر عن خطط الأسعار المختلفة زور اللينك دة: https://trello.com/pricing
مزايا وعيوب تريلوا من وجهة نظر المستخدمين:
المميزات:
- واجهة سهلة الاستخدام user friendly interface
- نسخة الموبايل بتساعدك على متابعة الشغل من أي مكان
- مفيش وقت كتير بيضيع في المكالمات والإيميلات
العيوب:
- هتحتاج وقت عشان تعرف كل الخيارات الموجودة في البرنامج
- أداة مناسبة للشركات والفرق الصغيرة مش الكبيرة
الخلاصة
دي كانت نظرة سريعة على تريلو اتكلمنا فيها عن أهم خصائص البرنامج للناس إللي لسة ما جربتوش ولو حد جربه يا ريت يشارك معانا تجربته.
