أنا سمعت الاغنيه دي بس مش فاكر بتقول ايه ، كانت تقريبا شاي ناني نناي ناي!
تقعد تدور علي جوجل علي الاغنية متعرفش تجيبها. لحد ماتسمعها مره كمان، متعرفش برضوا تجيب الكلمات عشان هما بيغنوا بسرعة. تيجي تقرأ المقالة وتعرف ان فيه ابلكيشن اسمه شزام. تقدر تشغله على أي أغنيه ويقولك اسم الاغنيه ايه!
وتكتشف ان اسمها “Shine Bright Like a Diamond” للفنانة القديرة Rihanna.
طيب هتيجي تقولي “ايه رايك ان انا كنت عارف شزام قبل ما قرأ المقالة دي؟“
انا هقولك انت هتستفاد ازاي و ازاي ابليكشن بسيط ومن غير فلوس بيكسب. خليني أقولك شوية عن تاريخ شزام الاول.
ايه هو شزام (Shazam)؟
شركة شزام بدأت كفكرة في ١٩٩٩. قدروا في ٣ سنين يكون عندهم قاعدة البيانات لحوالي مليون أغنية. هتقولي ايه ده ازاي هو كان في اصلا applications في الوقت ده؟
في الاول كنت بتضطر تكلم ٢٥٨٠ و ده كان الرقم خاص ب شزام. تحط التليفون جنب الراديو و تستنى وبكده يقولولك اسم الاغنية. طبعا الشركة واجهت مشاكل كتير جدا في تحديد ال business model. و في سنة ٢٠٠٣، ٣ من أصل ٤ مؤسسي شزام كانوا سابوا الشركة. وكانوا بيخسروا في الأول. وبعد حوالي ١٥ سنة وصلت القيمة السوقية للشركة مليار دولار وحوالي ٣٠ مليون أغنية في ال database.
طيب كل ده جميل طيب الربح بقى جيه ازاي ؟
١– شزام بعد ما بيطلعلك الاغنيه بيقولك لو عايز تسمعها في وقتها ويبعتلك علي Spotify أو Apple Music. ويأخذ جزء من الربح بتاع تشغيل الأغنية. ده بيبقى حوالي ٥ – ١٠٪. كأنه وسيط يعني بالبلدي. وعشان بس تكون متخيل الارقام ، شزام بيجلهم حوالي ١٧ مليون tag في اليوم! و ده رقم كبير طبعا.
٢– عن طريق الإعلانات. ان شركات تعمل اعلانات على الابليكشن .قدرت شزام تعمل ٤٥٠ campaign بتكلفة تصل الى ٢٠٠ ألف دولار الواحدة!
٣– واخيرا هو المستثمرين الذين يستثمرون بأرقام كبيرة في الشركة.
شزام اتباعت مؤخرا لشركة Apple من غير ما يعلنو عن الرقم (هم خايفين من الحسد ولا ايه؟). ولكن يقال إن هم دفعوا حوالي ٤٠٠مليون دولار!
الدروس المش مستفادة
في الاخر مش هقولك ايه الدروس المستفادة بالساهل كدة ، عشان متحسش انك في حصة لغة عربية. بس هقولك ازاي تطبق ده علي الواقع وده الاهم. لازم تعرف ان طريق ريادة الأعمال طويل ومتعب بس تعب وانت مبسوط عن تعب وانت مخنوق. طالما قررت تاخذ الطريق لازم تكون مستعد انك تخسر في الاول، ده طبيعي.محتاج شغف. هتدفع كتير من جيبك ، ده طبيعي. لحد ما واحدة واحدة تبتدي تقوم وتنطلق. وده اللي حصل مع شزام . شركاؤه سابوه ،وبدا يطلع. انت كمان ممكن تقدم على مسابقة او برنامج الاحتضان. شزام ربح بعد سنين مقفلش المشروع وقال خلاص انا يأست. لازم هتلاقي احباطات. هيكسروك هيوقعوك هيحبطوك، خليك دايما جامد الي باقي الاغنية …. و لو مش عارف الأغنية دي، ممكن تستعمل شزام!
مصادرنا:
How Shazam Makes Money, Investopedia.
Why Did Apple Buy Shazam, CNBC.
