فشلنا بيبدأ من اول ما نتولد, و بنفضل نفشل و نتعلم. ازاي هتتعلم تمشي مثلا من غير ما تتشقلب على وشك كل يوم عشرة خمستاشر مرة. المشكلة ان في فترة معينة من حياتنا بنبطل نبص للفشل على انه تعليم. و محدش بيقلنا مبروك انت اتعلمت حاجة جديدية عن حياتك و البيئة المحيطة بيك. يلا بقى قوم طبق اللي انت اتعتلمته و ابقى احسن!!.
في عالم الشركات و الشغل: مهما كانت الشركة كبيرة و مهما كان المنتج مبدع, هيفضل برضه فيه نسبة للفشل. و على مدار ال 50 سنة اللي فاتوا العالم مر بتطورات سريعة. ده خلى ان كل فترة يطلع منتج ثوري يا اما يغير العالم, زي الانترنت مثلا, او يبقى ثوري لدرجة انه ما يتفهمش. او حتى ساعات يبقى ليه طلب في السوق بس يعطل علشان مشاكل مادية او سياسية.
الامثلة لكدة كتير. اخترنا منهم خمسة, نتعلم منهم, و نعرف ايه الغلط اللي حصل. او حتى نضحك و نستعجب. المهم ان ساعة الجد نفتكرهم, و منخليش الفشل يحبطنا, و نبصله على انه شيء ضروري و خطوة لقدام.
Teleguide
تقدر تقول عليه الانترنت اللي قبل الانترنت, تخيل انك في 1991 كنت ممكن تطلب اكل اونلاين مثلا, او تدور على قطع غيار مستعملة لعربيتك. Teleguide بدأ في 1991 و رفع الراية البيضة في 1993!!
ليه فشل؟
علشان شركة الاتصالات السويدية اللي كانت بتبيعة ما عرفتش تتفاوض على سعر احسن من المورد, و انتهى بيها الموضوع انها كانت بتخسر على كل وحدة بتتباع فا مقدرتش تكمل.
عجلة itera البلاستيك
اي حد بيركب عجل هيقلك ان اهم حاجة هو وزن العجلة, علشان كده فكرة العجلة البلاستيك كانت مثيرة للاهتمام. و الدراسات التسويقية الميدأية قالت ان العجلة هتكون ناجحة جدا. بس اللي حصل ان الشركة اللي ابتدت في 1981 قفلت بعد سنة واحدة من قلة الطلب و المرتجعات.
ليه فشلت؟
بكل بساطة علشان البلاستيك اتضح انه ما بيستحملش, و القطع الحديد كانت ما بتركبش كويس على البلاستيك و كانت بتكسره. من الاخرالشركة ما اهتمتش بدراسة جودة المنتج قد ما اهتمت بدراسات التسويق.
Ford Edsel
فورد سوقت للعربية على انها عربية المستقبل, كنت بتغير النقلات بزرار على الديريكسيون. فورد استثمرت كتير في التسويق للعربية. لمدة سنة كاملة قبل الانتاج, كانت فورد بتعلن عن ال Edsel في كل مكان. بس بعد ما العربية نزلت السوق فعلا سنة 1958, اتوقف انتاجها في 1960.
ليه فشلت ؟
رفع التوقعات بشكل اكبر من الواقع هو كان السبب الرئيسي ان العربية تفشل بالطريقة المهينة دي, الناس اللي توقعت انها هتلاقي عربية من المستقبل فعلا, اول ما شافوا العربية على الحقيقة ما اخدوش وقت كتير علشان يعرفوا انها عادية و مبالغ في سعرها.
DIVX
دي كانت فكرتها ان ال DVD بدل ما تأجره, هو بتجيبه و هيفضل شغال 48 ساعة بعد اول مرة تشوف الفيلم و يتقفل بعد كده. و بكده تبقى حليت مشاكل التأجير (خطة في منتهى الذكاء)
ليه فشل ؟
ما كانش ايجار و مكانش شراء و فكرة انك يبقى عندك حاجة دافع فلوسها و مش عارف تستخدمها محدش عرف يتقبلها.
Apple Newton
اول جهاز اتعمل في العالم يقدر يحول الكتابة بالايد لحروف ديجيتال. كان حاجة ثورية بمعنى الكلمة. الجهاز ده هو اللي عرف الناس على مصطلح personal digital assistant بس بعد ما ابتدلى الانتاج في 1993 اتوقف بعد خمس سنين بس في 1998.
ليه فشل ؟
الجهاز كان سعره غالي جدا على المستخدم, ده غير ان نظام التشغيل كان فيه مشاكل برضه. ف Steve Jobs بنفسه امر بوقف انتاجه في 1998.
احنا بقى نتعلم ايه من كل ده؟
لو بصيت على كل الامثلة اللي اتكلمنا عنها, هتلاقي ان الصفة المشتركة ما بينهم فعلا هي الابداع. كلهم فيه فريق فكر فيهم كتير و طلع حاجة جديدة ما اتعملتش قبل كده. ده معناه ان مش هو ده الحل السحري للنجاح. او اصلا مفيش حل سحري للنجاح. بس البلوج بوست ده مش بيتكلم النجاح, الاهم من النجاح هو تعاملك مع الفشل. ازاي تفشل صح بحيث انك تنجح المرة اللي جاية. و ازاي ان حتى اكبر الشركات و اكتر المتجات ابداعا ممكن تفشل لو ما انتبهتش للتفاصيل. بس المهم انهم بيقوموا تاني و مبيقفوش عند الفشل.
!قولنا رأيك
.احنا في startupsgalaxy.com حلمنا هو اننا في يوم من الايام نساعد شركة ناشئة عن طريق موقعنا انها توصل لاكبر عدد من الناس
Related: Check out startups related to Tech!
