ناس كتير بتبقى عايزة يبقى ليها شغلها الخاص بيها، بس مش بتبقى عارفة تبتدي منين أو ممكن تفقد حماسها.
قائمة الكتب دي ممكن تساعدك وتديك فكرة عن تبتدي إزاي وكمان عن كيفية استمرارية شغلك.
1) Startup Arabia by Amir Hegazi
أمير حجازي، هو راجل بقاله ١٥ سنة في مجال البيزنيس. اشتغل مدير عام في سوق.كوم و شريك في شركة كبيرة في الشرق الاوسط وافريقيا. بيحكي في كتابه عن رجال الاعمال اللي في مجاله من خلال لقائات. بيحكي برده عن الصعوبات اللي واجهتهم وإيه كانت الرؤية اللي عندهم عشان يبدأوا و ينجحوا في البيزنيس بتاعهم. ممكن تلاقي الكتاب على سوق.كوم.
2) Think and Grow Rich by Napoleon Hill
للكاتب نابوليون هيل صاحب لقب “the granddad of all motivational literature”. الكتاب ده أول كتاب يدي “وصفة” النجاح. موجود فيه قصص عن أصحاب شركات معروفين، زي هنري فورد صاحب شركة فورد للعربيات وأندرو كارنجي اللي أدى لتوسع صناعة الحديد في امريكا، و برده توماس اديسون مخترع اللمبة.
الكتاب موجود على سوق.كوم ومكتبة ديوان.
3) The Lean Startup by Eric Reis
معظم الشركات الجديدة بتقع في أخطاء ممكن تأدي لفشلها، بس الأخطاء دي ممكن تتجنبها. اريك الكاتب بيوصف في الكتاب طرق مختلفة تواكب العصر الجديد أصحاب شركات استعملوها وبيوصف برده إيه المطلوب من أصحاب الشركات الجديدة عشان يتفادوا أخطاء شائعة و يختاروا طريق نجاح سليم و موثوق.
الكتاب موجود على سوق.كوم ومكتبة ديوان.
4) The E-Myth Revisited b Michael E. Gerber
من الكتب الأفضل مبيعاً. بيحكي عن الخرافات اللي ممكن تخوف أي حد عايز يبدأ في بيزنس جديد ويبين أن الإفتراضات الشائعة بتقف في طريق إدارة عمل ناجح. نجح جربر، الكاتب، في وصف القارئ في مراحل حياته، من مرحلة الصغر لمرحلة الكبر اللي اصبح فيها شخص ليه قرارات.
الكتاب موجود على سوق.كوم.
5) Rework by Jason Fried
ريورك، هو ببساطة كتاب مختلف، لإنه مش بيقول النصايح اللي معظم الكُتاب بيقولوها عن مجال البيزنيس زي اعمل خطة ونفذها. الكتاب ده بيخلي القارئ يفكر بشكل مختلف عن الشغل و البيزنيس عشان بيوفر طرق مختلفة، سهلة، سريعة وموفرة للوقت لإدارة بيزنيس بنجاح.
الكتاب موجود على سوق.كوم.
6) The 4-Hour Workweek by Timothy Ferriss
ناس كتير اتحبسوا في شغلانات ال9-5. بس لو عايزين مخرج، الكتاب ده هو الحل. في الكتاب فريس، الكاتب، بيشجع الناس إنهم يستغلوا الحاجة اللي بيحبوها عشان تعملهم دخل ويبقى ليهم سيطرة على حياتهم عشان يطلعوا بره دوامة الاربعين ساعة شغل في الاسبوع و يعيشوا حياتهم.
الكتاب موجود في ديوان.
7) The $100 Startup by Chris Guillebeau
مش لازم يبقى معاك ميزانية كبيرة عشان تبدأ البيزنيس بتاعك وأكبر دليل على كدة هو الكتاب ده. في الكتاب، الكاتب بيقنع القارئ إن أكتر رجال الاعمال الناجحين ماكانوش اغنياء كفاية عشان يبدأوا بيزنيس إنما انتهزوا فرص وكافحوا عشان يوصلوا. في الكتاب ٥٠ قصة ملهمة بتحكي عن ناس بدأوا بفلوس قليلة جداً.
الكتاب موجود في سوق.كوم.
8) The Art of The Start by Guy Kawasaki
عندك فكرة بس مش عارف تبدأ منين؟ مش مشكلة. كواساكي، الكاتب، ومدير تسويق شركة آبل، هيديك إلهام في الكتاب بتاعه عشان تبدأ وغير الإلهام هيديك طرق سهلة وبسيطة تخليك تاخد خطوة كبيرة وتبدأ البيزنيس بتاعك.
الكتاب موجود على چوميا.كوم وسوق.كوم ومكتبة ديوان.
9) Getting Things Done by David Allen
وأنت صاحب بيزنيس صغير بتركز في تفاصيل دقيقة جدًا بتأدي للتوتر و القلق. آلين، الكاتب، هيعلمك في الكتاب إزاي تتخلص من القلق وتحافظ على هدوئك وتخلي عقلك صافي عشان تعرف تاخد قرارات مهمة في شغلك من غير توتر.
الكتاب موجود في ديوان و سوق.كوم.
10) The Fire Starter Sessions by Danielle LaPorte
وأنت بتبدأ بيزنيس جديد بيبقى عندك حماس شديد بس بيقل مع مرور الوقت. الكتاب ده هيديك إلهام تكمل في ١٦ حصة أو قصة تخليك توصل لحلمك وكمان هتساعدك في إن حماسك يرجع تاني زي الاول ويثبت.
الكتاب موجود على سوق.كوم وديوان.
لو قريتوا كتاب أو أكثر من دول، شاركونا بأكثر نصائح استفتدوا منها. قريتوا كتب غير دول وفرقوا معاكوا؟ قولولنا عليهم.
