هل أسوأ لحظة في يومك لما المنبه يرن الصبح علشان تصحى تروح الشغل؟
ايوه شايفك وأنت بتضحك وبتقول ايوه، وعينك مليانه شغف مستني هقولك ايه …
الشغف الكلمة الي حيرت الملايين، كلمه فعلا ساحره اول ماتسمعها تحس انك مبسوط وسعيد. التريند المنتشر بقالوا فتره كبيره وهوجه الشيفت كرير(Career Shift)، هل اسيب الشغل الي بقبض فيه كويس واعمل اللي بحبه؟ طيب افرض عملت كده هصرف منين ؟ طيب افرض عملت كل ده وفشلت ؟هكون ضحيت بشغلي عشان شويه اوهام!!!! طيب أعمل ايه في ضغط المجتمع وأهلي؟ طيب انا اه بكره شغلي بس مش عارف انا بحب ايه؟ تفضل الأفكار دي تلف في دماغك لحد ماتلاقي نفسك وصلت لنقطة الصفر من تاني.ـ
طيب نبدأ من أول السطر… هل في حاجه اسمها شغف؟
ايوه طبعاً علماء كتير اتكلموا في الموضوع ده وأبحاث ودراسات وتدريبات كتير اتعملت عشان يكتشفوا طريقه ازاي تكتشف شغفك ،العلماء وصفوا الحالة دي ،بانها الحاله الي عقلك فيها بيسكت والأفكار بتوقف خالص وبتحس بحاله الصفاء الذهني. وبمعنى أكثر عارف لما تكون متضايق من حاجه وفجأه تروح مثلا ترسم وتلاقي الوقت عدى كأنه دقائق وتلاقي نفسك نسيت الي كان مضايقك. عشان اقربلك أكتر، فاكر في الأفلام لما تلاقي واحد بيحب واحده وأول ما يشوفها تلاقي الزمن وقف والدنيا بقت وردي وشعرها بيطير بالتصوير البطيء؟ هي دي الحاله فعلا اللي بيكون فيها الي بيعمل حاجه بيحبها و بعض العلماء وصفوه الحاله دي “It’s the state in which your heart sings”.
عشان اقولك مثل هيلمسك بجد فاكر ايام المدرسه واحنا صغيرين لما كان يبقى عندنا رحلة تاني يوم، وأنت مبسوط جداً ومتحمس جداً لدرجة ان مش جايلك نوم وعايز الليل يخلص بسرعه ،وخلاص مجهز السندوتشات واخيرا هتروح المدرسة بلبس خروج ، انت عارف اليوم ده مابيجيلكش نوم ليه؟ لان شعور الشغف و الفرحة والحماس الي انت حاسسها احسن من الراحه اللي بتلاقيها في النوم . ده نفس حال الي بيعمل حاجه بيحبها انه ممكن يطبق بالتلات أيام بيشتغل لأنه مستمتع ومبسوط جداً، النوم والأكل بقيت حاجات مش مهمه بالنسبه له او مش اساسيه.
المشكلة بقى تيجى فين…
المشكلة ان ناس كتير بدأت توقف حياتها وتسأل نفسها السؤال ده. ايه هو شغفي ؟؟ حتي لو هو مبسوط في شغله ويبدأ واحده واحده يكره شغله. وكل ما يفكر في مجال يخاف يبدأ فيه، من فكرة أنا خايف مايكونش ده شغفي ويسيبوا وينتهي بيه الحال ل “Identity crisis”.
طيب ايه الحل لكل ده؟ وازاي اقدر احول الكلام ده لواقع وازاي اكتشف الحاجة اللي بحبها واجيب منها فلوس؟
كل ده ها نجاوب عليه في المقالة اللي جايه…
شوف الstartups الجديدة على Startups Galaxy من هنا.
