دي كانت تصريحات السيسي في المؤتمر الأخير لما سأله صحفي فرنسي. فكنا لازم نتكلم إزاى إن ريادة الأعمال بتقدم حلول لمشكلة زي البطالة.
ومن هنا افتكرت موقع WUZZUF (وظف.كوم) اللي بيوصل الشركات اللي محتاجه موظفين بالشباب اللي عايزه تشتغل، بس طبعًا واجه صعوبات كتيرة أوي تهد أي شركة ناشئة! مفيش حظ أوحش من إنك تحاول تبدأ موقعك الأونلاين وتحصل ثورة بعدها بأسبوع والنت يقطع في مصر وتخسر قبل ما تبدأ.
دي كانت اول عقبة قدام أمير شريف، الشريك المؤسس لشركة WUZZUF (وظف.كوم). أمير شاب أتخرج من كليه هندسة جامعة القاهرة عام ٢٠٠٤ وقرر في شهر يناير 2011 يطلق شركته. ورغم صعوبة التوقيت جدًا، قدر أمير يطبق مقولة “من قلب المحن تولد المنح“. الفتره دي شركات كتير بدأت تسرح موظفيها وقدر أمير يستغل المشكلة وهي مشكلة البطالة الي زادت جامد في الفترة دي ،ويبدأ شركته وخلال 4 سنين وظف قدرت في وقت قياسي توظف 50 ألف شخص في 4000 شركة وتعرض أكثر من 800 الف وظيفة.
إزاي قدر أمير وشركاه يتخطوا مشكلة الثورة والانترنت؟
هما قرروا أن هما يتبعوا استراتيجية التقشف اللي هي شد الأحزمة وبدأوا خلال أول سنتين أن هما يتوجهوا للاستشارات والبرمجيات على الطلب عشان بس يعرفوا يجيبوا سيولة. وبدأوا واحدة واحدة يقفوا على رجليهم بعد 2013 وبدأت الاستثمارات تيجي وينطلقوا. وصلت القيمة السوقية للشركة ل 7 مليون دولار في 2015 وأمير اتحول من مجرد مهندس زيه زي ملايين المهندسين لمليونير عنده شركه بتشغل مئات الآلاف من الموظفين.
وظف كانت ليهم انجاز كبير أن هما في 2014 كانوا اول startup مصرية تنضم ل 500Startups وهي من أكبر مسرعات الأعمال بالعالم و قدروا ياخدوا 300 ألف دولار كجوله تمويلية.
ازاى أمير قدر ينضم ل 500Startups؟
هما قدموا في الجولة السابعة من البرنامج واترفضوا، بس بعدها بكام شهر بمساعدة مستثمر من المستثمرين سافروا لعمان وعرض الفكرة قدام مجموعة من المستثمرين، وهو كان رايح مش حاطط أمل لانه كان عارض الفكرة قدام 100 مستثمر قبل كده واترفضوا.
هناك، قابل مؤسس 500Startups (ديف ماكلير) اللي عجبته الفكرة وشجعهم أن هما يقدموا تاني وبعدها كانوا هيترفضوا للمرة التانية لأن هما كانوا مترددين لكونهم أول شركة مصرية تقدم وبعدين كانوا في قائمه الانتظار واتقبلوا أخيرًا بعد عناء طويل.
وكان من أهم أسباب القبول أن الشركة عدت بصعوبات كتير وقدرت تتخطاها.
ودايمًا بيكون التحدي الي بيفرق شركة ناشئة عن التانية هو المشاكل اللي هتظهر لو أنت مؤمن فعلاً بالموضوع أنت وال team وبالنسبه لكم حياه أو موت فعلاً هتكمل وتعدي المشاكل أما لو هي مجرد تسليه وتجربة جديدة مع أول مشكلة هتزهق وتتراجع، هو قرارك اللي بيفرق في كل حاجة.
