طب إيه؟ كل اصحابي اللي كانوا معايا في الجامعة بقوا founders و CEOs؟
طب منا أذكى منهم وأشطر منهم و وكذا و كذا أكتر منهم بكتير … حلو اوي. أنا بكره هطلع عالجريك وأجر مكتب وهعمل ستارت اب جديده. مجتش عليا!
دي فكره مستهلكه. شوية كلمات محفوظة عن “الميشن” و“الفيجن” و التأثير في المجتمع. مع طريقة كلام معينه عشان دي هي الإثبات انك بتعمل impact في المجتمع. حلوه impact دي استخدمها كتير. وزود من ال exposure وال approach. بس الموضوع مش شوية كلام انجليزي و خلاص. لو عايز تبدأ حاجه متقفلهاش كمان أسبوع ففيه شوية حاجات لازم تكون عارفها.
ازاي تبدأ
١– انك لازم تتابع وتعرف الأفكار اللى اتنفذت بالفعل عشان اللى تعمله يكون تطوير مش تقليد
٢– اعرف مين الأسماء الكبيرة اللى بتتحكم دلوقتى فى المجال اللى انت داخل عليه وادرس السوق بدقة
٣– تابع صعود وهبوط أسماء معينة في مجال الentrepreneurship. الأسامي دي لازم تعرفها و تتابعها و تحضر لهم الحاجات اللي بيعملوها عشان يفيدوك قبل ما تبدأ بحاجات كتير ممكن تكون فلتت منك. اقرأ الموضوع على Startups Galaxy!
٤– قبل كل ده لازم يكون الدافع انك تبدأ حاجه زي كده أقوى من انك بقيت قاعد لوحدك وكل اصحابك راحوا الجريك وبقوا فاوندرز
فكر تاني
لازم تكون عارف ان ده للاسف مينفعش يبقى حاجه كده عالهامش. انت ممكن تضطر تسيب شغلك و تصرف من جيبك شوية قبل ما الدنيا تقوم أو تأخذ أجازة من شغلك عشان رايح تقابل مستثمر. كلنا عايزين ننجح في أسرع وقت و لو خطط للستارت اب صح من الاول، الخساير هتقل.
لو انت بتعمل خدمة أو منتج بيفيدك انت و اصحابك بس، فأنت هتفضل تصرف على ستارت اب بتاعتك على طول. لو انت بتخدم قطاع أكبر من الناس طبيعي فرصتك في النجاح بتزيد. وهنا انا لازم اقولك خلي بالك ان من الفروق الجوهرية بين ريادة الأعمال والبيزنس العادي. في فرق من انك هنا بتقدم فكره ربحها مش هييجي عالمدى القريب ، مش زي ما تفتح محل بلايستيشن ، مطعم ، عربية فشار …
ال entrepreneurship مجال الدخل فيه بيعتمد بنسبة كبيرة على الحاجة المختلفه اللى انت بتقدمها بتأثر في دايره قد ايه ؟؟ كل ما تأثيرك زاد مكسبك هيزيد. إيه رأيك لو تستنا على موضوع الجريك ده شويه و تسمع من اصحابك اللى راحوا قبلك ؟؟
