رأس المال من أساسيات قيام أي شركة، خاصة لو شركة ناشئة، طب ازاي انت كشركة ناشئة لسه بتبنى نفسك ولسه ببساطة كده مستجد في السوق هيبقى معاك راس مال كبير تقدر تعمل بيه حاجة محترمة لشركتك وللمنتج بتاعك، أكيد انت محتاج لمستثمر أو لحاضنات الأعمال..
طب وببساطة كده هل أي مستثمر هيقدر يساعدك ويديك الاستثمار اللى انت محتاجه، ولا لازم يبقى فيه خطوات محسوبة ومدروسة كويس عشان تقدر تخلي المستثمر لا تجبره كمان إنه يستثمر في شركتك..
تعالى نشوف بعض الخطوات دي..
1- ما تكونش فكرتك ناتجة من حماس شخصي وبس ،مهم تكون فكرة بتشبع احتياج في السوق سواء لأفراد أو شركات وسواء كان تنفيذها أونلاين أو على الأرض.
2- لازم تبقي واثق 100% في المنتج ومشروعك، وطريقتك في العرض ودرجة اقناعك للمستثمر في المنتج بتاعك برضة دي من الخطوات المهمة جدًا اللى هتفرق معاك، ده ساعات المستثمر يستثمر بيك انت شخصيًا أكتر ما هيستثمر في المنتج، لأنه هيكون واثق في قدراتك لو نجحت يبقى قدرت توصل لهدفك في النهاية ولو فشلت هيبقى انت عملت اللى عليك.
3- لازم تكون مرن، لو المستثمر حب يعدل على فكرتك ويضيف افكار رحب بيها وادرسها وشاركه ، خاصة أن المستثمر بيبحث عن الصفقات الناجحة، حاول تديله أدلة إضافية تقنعه بيك وبفكرتك وبشركتك عشان تبين له مدى شغفك.
4- دور على منصات التمويل الجماعي، والمنصات دي للى ميعرفهاش هي عبارة عن منصات إلكترونية بتهدف لتمويل المشاريع، وصاحب المشروع بيعرض فكرته ويوضح مميزات وأهداف مشروعه ويحدد تكلفته، ويمكنه استخدام الأموال اللازمة لتمويل المشروع خلال فترة زمنية بيتم تحديدها، ومن أمثلة للمنصات الالكترونية زي “بداية، وذو مال، وشركتي، ويمكن“.
تعالى دلوقتي نعرف أنواع المستثمرين
فيه أنواع من المستثمرين ولكل نوع منهم له ايجابياته وسلبياته
1- المستثمر المقرب: دول أول وأسهل نوع وهم الأهل والأصدقاء وبيوفرولك مبلغ بناء على الثقة والمعرفة، ومن حظك وجود أحد هؤلاء الأفراد خاصة أنهم عندهم خبرة استثمارية وفي الأغلب هتحصل منهم على المال من أجل شركتك أو مشروعك.
2- المستثمر الملائكي: بتلاقي عنده اهتمام وإيمان بالفكرة بتاعتك، وده بيديه تحفيز للمخاطرة بمبلغ من المال لدعم شركتك، وفي الأغلب ما بيعقدوش الأمور ولا بيدخلوا في تفاصيل دقيقة وبتكون محاولة اقناعهم سهلة.
3- مستثمر في مراحل البدايات: النوع ده من المستثمرين بيهتم بالشركات اللى لسه في المراحل الأولى من نشأتها بس عندها فكرة مبتكرة أو جيدة تثبت قيمتها.
4- مستثمر رأس المال الجرئ: وده مطلب الجميع، ولو وصلت للمستثمر ده شركتك هتنمو بشكل ملفت، والنوع ده بيتطلع لشركات قائمة بأرباح ونصيب من السوق، وبيضخ مبالغ مالية كبيرة عشان يسرع عملية النمو ويستفيد من القيمة السوقية المتضاعفة.
ممكن يخونك التفكير وترفض عرض مستثمر وتقوله لا بس قبل ما تقوله كده فكر في أولويات عديدة زي..
- قيمة المستثمر الغير مالية: يعني خبرته، علاقاته، فرص عقود جديدة، يفتحلك مجالات وغيرها.
- وضع شركتك الحالي: لو لم تحصل على المبلغ من المستثمر هل هتابع العمل في شركتك بشكل طبيعي ولا ممكن تقفلها ولا هتخسر كتير لو ملقتش المبلغ المطلوب.
- اهتمام المستثمر بشركات مشابهة: يعني مثلا لو شركتك في مجال تكنولوجيا الهاتف المحمول، وعارف ان المستثمر عنده رغبة كبيرة أنه يدخل ويستثمر في نفس المجال، وفيه شركات تانية غيرك في المجال ده، ما ممكن المستثمر يضخ أمواله في شركة منافسة وهي تستفيد من الدعم والتقدم والنمو الأسرع منك.
- شروط المستثمر: الشروط ليها دور كبير أوي في اتخاذ القرار، بعض المستثمرين بيسعوا لنسبة كبيرة من السهم لكن مبيسعوش للتحكم في قرارت الشركة وفيه منهم العكس، وفيه منهم بـ يطلب النقطتين مع بعض، كل اللى عليك أن تكون منطقي في طلباتك لأنه في الأخير بيخاطر معاك بماله.
وفي الآخر لازم تراعي عدة أمور وتجاوب على عدة تساؤلات بتأني وأنت بتتعامل مع المستثمر
هل المستثمر عنده خبره في مجال عمل شركتك؟
هل تتوافق توقعات المستثمر مع توقعاتك من الشركة يعني لوهدفك التوجه لزيادة عدد المستخدمين هل هيدعمك وهيحقق هدفك؟
هل المستثمر عنده قدرة على إنشاء مجلس استشاري عالي الجودة للشركة من خبراء وكفاءات تساهم في النجاح؟
طب ايه اللى هيقدمه المستثمر غير الدعم المادي؟ قنوات دعائية، ولا فرص ولا علاقات ولا خبرة قانونية أو إدارية؟
وسؤال بسيط بس مهم: هل ممكن تكون الجهة الاستثمارية عميل لمنتجك؟
