بص انا عارف انك كل ما تقرأ لي مقالة هتتصدم. بس الكلام ده حقيقي و هتتصدم اكتر لما تكمل المقالة.
معقوله فتكات بتاع التعارف الجاد ووصفات الكوسة المحشية!!! ده كل الناس بتتريق عليه معقوله في مستثمر عاقل يشتري الكلام ده ؟
بص انا هحكيلك قصة غريبة جداً. بتاعت إنشاء الموقع وبعدين اقولك أرقام وأرباح الموقع الأغرب.
بص يا سيدي اللي اسس الموقع مهندس و اسمه محمد حسام خضر. هو كان أنشأ أكثر من موقع منهم موقع اسمه “bent halal” للجواز والتعارف الاونلاين ووصل نجاحه على حسب كلامه لحاله جواز واحدة يومياً.
وبعد النجاح للموقع قرر موقع “mktob” يشتريه ودي كانت اول مرة يعمل موقع ويطلع دخل من وراه .
وفي يوم والجو حر في الصيف في ٢٠٠٧ كان اخواته البنات ال٦ زهقانين جداً. وسألوه نعمل إيه عشان نملي فراغنا في الاجازه؟ قالهم خشوا على اي منتدى او على النت واتفاجأ ان مفيش موقع للبنات يعرفوا يدردشوا فيه. وقال خلاص يبقى لازم اعملهم موقع عشان اخواتي حبايبي ميفضلوش زهقانين كده.
طبعاً دي قصه غريبه جدا الأغرب أن خلال اول سنة وصل عدد ال users ١٥ ألف شخص! وده نمو كبير جداً. حتى وصل فتكات لذروته لما بقى أكثر موقع عليه traffic في مصر (قبل ما يستحوذ اليوم السابع على المركز ده ). وتم تقدير الرقم ب ١٠ مليون مشترك شهرياً! انتوا متخيلين الرقم؟! ٢٥٠ مشرف على الموقع واقسامه اللي كانت فيها طبخ وموضه و دردشه وحاجات عجيبه من اللي البنات بتحبها.
ومع النمو الرهيب ده الموقع اتباع حصة منه لمستثمر و متمش الاعلان عن الصفقه بس تُقدر ب ملايين!
طيب ايه سبب النجاح الرهيب لفتكات؟
١– أول حاجه ان هما استخدموا concept في ال marketing اسمه love mark.
هو concept هدفه انه يخلق حالة حب كبيرة بين ال customer والموقع. وده كان بيتم عن طريق دراسة سيكولوجية المرأة، و التوجه إليها بالكلام شخصياً.
من بعض الأمثلة والتي تعتبر تفصيله صغيره بس موثره، هي ان فتكات كان أول موقع في خانة التسجيل يكتب كلمة سجلي. ويخاطب البنت بالتأنيث ودي كانت حاجه جديده و فريده مع وجود منتديات تخاطب البنات، وبيكون ال interface سجل وبصفة الذكورة ودي حاجه فرقت جدا وبدأت تبني علاقه قويه مع المستخدمات!
٢– التطوير الرهيب للمحتوى لدرجة أن إتعمل ٧ مواقع تقوم على خدمة فتكات زي مواقع لوصفات الطبخ، مواقع للهدوم وغيره وده خلى الموقع يكون عنده محتوى غني جدا، وخلى تفكير الزائرة إن أنا عايزه أقعد أطول فتره ممكنه عشان أعرف أكثر عن المحتوى الموجود، وميكونش فايتني اي حاجه. وده خلق تنافس مابينهم.
٣– تالت حاجه أن الفيس بوك ماكنش لسه انتشر. وكان فكر البنات وقتها الي هو: الي عنده فيس بوك ده حاجه عيب لحد ما الفكر ده اتنسف بعد الثورة!
