إنك تبدأ مشروعك الخاص مش خطوة سهلة أبدًا. دائمًا فيه تفاصيل و تحديات لازم تأخذها في الاعتبار.
ووجود إطار تفصيلي ممكن من خلاله تكتشف الفرص وتحدد المخاطر أكيد هيخلي كل حاجة أسهل بالنسبة لك. ومن هنا ظهر تحليل SWOT.
.For the article in English, go to this post
إيه هو تحليل SWOT؟
تحليل SWOT هو أداة بسيطة ولكن قوية هتساعدك إنك تطور استراتيجية مشروعك سواء كان ستارت اب أو شركة بتشتغل بالفعل.
يعني ايه تحليل SWOT؟
SWOT هي أول حرف في 4 كلمات
S : Strengths نقاط القوة
W : Weaknesses نقاط الضعف
O : Opportunities الفرص
T : Threats التهديدات
يتكون من جزأين :
الجزء الأول داخلي وده بيكون داخل مشروعك وتحت سيطرتك (نقاط القوة ونقاط الضعف) والجزء الثاني خارجي وده بيكون خارج مشروعك ومتقدرش تتحكم فيه (الفرص و التهديدات).
إزاي هتكون مفيدة بالنسبة لي؟
- هتفيدك من حيث التكلفة لإنك مش هتحتاج مهارات خاصة أو تدريبات مكثفة ولا حتى هتحتاج مستشار خارجي. كل اللي هتحتاجه واحد من فريقك يكون فاهم المشروع كويس.
- هتوفرلك نظرة شاملة هتساعدك على إنك يكون عندك نطاق واسع من المعلومات وبالتالي هتكون فاهم اكتر لاستراتيجياتك و للسوق اللي أنت موجود فيه وده اللي هيساعدك إنك تأخذ القرار الصح.
- تحليل SWOT هيوفرلك رؤية واضحة لنقاط قوتك وهيظهرلك نقاط ضعفك. هيعرض لك الفرص الموجودة وهيساعدك تعرف التهديدات.
إزاي اعملها بشكل مضبوط؟
كل اللي عليك إنك تجاوب على الأسئلة دي.
1- نقاط القوة:
- إيه هي الحاجات اللي بتقدر تعملها بشكل كويس جدًا؟
- إيه هي مهاراتك المميزة؟
- إيه هي خبراتك أو المعرفة المعينة اللي عندك؟
2- نقاط الضعف:
- إيه هي المجالات اللي محتاج تطور نفسك فيها؟
- إيه هي الموارد اللي مش موجودة في مشروعك؟
- إيه هي الحاجات اللي محتاج تعرف عنها أكثر أو تأخذ فيها خبرة أكتر؟
دلوقتي أنت معاك كل المعلومات المتعلقة بالجزء الداخلي لمشروعك الخطوة الجاية هي الحصول على المعلومات المتعلقة بالجزء الخارجي.
3- الفرص:
- ايه هي أهداف المشروع اللي أنت شغال عليها دلوقتي؟
- إزاي ممكن تستفيد من التكنولوجيا في إنك تطور مشروعك؟
- هل هناك جمهور جديد ممكن تستهدفه؟
4- التهديدات:
- إيه هي المشاكل الخارجية اللي ممكن تواجهها؟
- إيه هي نقاط القوة عند أكبر المنافسين ليك؟
- إيه هو وضعك الاقتصادي؟
بعد الإجابة على الأسئلة دي هتقدر تخطط لاستراتيجياتك الجديدة بنجاح. ودلوقتي فكر بطريقة مبدعة إزاي ممكن تستفيد من الفرص وتحسن التهديدات وإيه اللي ممكن تعمله عشان تحول نقاط الضعف إلى نقاط قوة. برضه فكر إزاي تجمع بين نقاط القوة والفرص أو بين نقاط القوة والتهديدات. في المرحلة دي هتحتاج أنت وفريقك إن يتم بينكم تبادل أفكار عن طريق العصف الذهني أو الـ brainstorming.
لو طبقت الموجود في المقالة هتكون قادر إنك تكتشف فرص جديدة وتأخد قرارات صحيحة والأهم إنك هتتأكد إن مشروعك ناجح.
شارك معنا تجربتك مع تحليل SWOT وإزاي قدرت تستفاد منه في مشروعك!
