انتشر التسوق أونلاين بشكل كبير الفترة اللي فاتت في مصر.
For English version, click here.
من أهم المواقع اللي خلت التسوق أونلاين ينتشر في مصر والناس تشتري حاجات من بره أكثر هم سوق.كوم وجوميا. ممكن يكون موضوع التسوق أونلاين مش منتشر في مصر زي بلاد أخرى بس مؤخرًا بدأت ناس أكتر تتقبله كبديل.
عشان توصيل المنتجات لمصر من الخارج عن طريق مواقع عالمية زي أمازون مش سهل، ده خلّى شركات ناشئة كتير تدخل في المجال ده بالذات الشركات اللي بتساعدك في عملية الشراء بس مش بتبيع لك حاجة مباشرة. دلوقتي بقى سهل أوي إنك تشتري حاجات من بره من غير ما تسافر. بَدَل ما تستنى صاحب خالك محمد ييجي من لندن ولا تسأل الناس على استحياء على فيسبوك “حد يا جماعة جاي من بره قريب؟” عشان تطلب منه يجيب لك الجزمة التيمبرلاند اللي نِفسك فيها.
جمعنا لكم الشركات الناشئة اللي بتساعد في موضوع التسوق أونلاين. هم سهلوا الموضوع للمستهلكين في مصر ومن غير ما تقلق من الجمارك ولا وقت التوصيل.
١ – لينكس Lynks
لينكس هي خدمة تساعدك إنك تتسوق من أي محل في أمريكا وبيصلوا لك لحد باب البيت. هم يتولوا موضوع الجمارك والشحن و أنت في البيت. كل اللي عليك تعمله إنك تبعت لهم لينك للمنتج اللي أنت عايزه وهم هياخدوا بالهم من الباقي.
شوفوا لينكس على موقع ستارتبس جالاكسي من هنا.
٢– هيتش هايكر Hitchhiker
الشركة الناشئة دي بتدي حلول هايلة للمشترين والمسافرين. لأن المشترين يقدروا يوفروا ثمن مصاريف الشحن والمسافرين هيجيلهم فلوس من السفر. بَدَل ما ناس تسافر ويبقى معاهم مكان فاضي في شنطتها دلوقتي يقدروا يعملوا فلوس من الموضوع ده. كده مش هتحتاج تعمل بوست وتسأل الناس على فيسبوك.
٣– شوب آند شيب Shop and Ship
شوب آند شيب هي خدمة تسوق عالمية تتيح لك التسوق من أكثر من 20 دولة. بتوصلك بسعر أقل من لما تشتريهم أنت مباشرة أونلاين. اللي بيخلّيهم مختلفين هو إنهم بيوصلوا لأقرب فرع شوب آند شيب ليهم في المدينة اللي أنت فيها. هم عندهم أكثر من 25 محل في مصر كلها، مش بس في القاهرة.
٤– ادفعلي Edfa3ly
ادفعلي هي خدمة تسوق برضه بتوصلك لحد باب البيت. تتيح لك إنك تطلب من أي موقع في العالم مش بس اللي في أمريكا. ممكن تطلب من مواقع من انجلترا والصين كمان. من خلال ادفعلي تقدر كمان حتى تشتري من المواقع اللي مش بتوفر شحن لمصر أو مش بتقبل كروت ائتمان من مصر. بيقولولك المبلغ اللي مفروض تدفعه ويحاسبوك على الوزن الإجمالي للمنتجات اللي أنت اشتريتها.
شوفوا ادفعلي على موقع ستارتبس جالاكسي من هنا.
الشركات الناشئة ديه خلت التسوق أونلاين أسهل وأسرع بكتير من الأول. وممكن كمان من خلالهم تعمل فلوس زي هيتش هايكر. ممكن تستفيد من كل شركة بطريقة لأن كل واحدة بتقدم الخدمة بشكل مختلف. لسه مفيش إحصائيات عن عدد الناس اللي بتتسوق أونلاين من خلال المواقع ديه. بس الأكيد إنها بتدخل منافسة مع المواقع العالمية بالذات بعد ما أمازون اشترت سوق.كوم.
استخدمت أيه من المواقع ديه قبل كده؟ احكيلنا عن تجربتك!
