“أنا عندي فكرة ستارت أب.”
كم مرة سمعت الكلام ده من صديق أو حد تعرفه؟ غالبًا كذا مرة وأحيانًا بتكون الأفكار مستوحاه من أبليكيشنز زي أوبر وكريم. لكن في أفكار تانية كتير غير تقليدية، بعضها غريب إلى حد كبير وبعضها ممكن نعتبره مميز أو بره الصندوق زي ما بنقول. اخترنا النهاردة خمسة من أغرب الأفكار إللي قامت عليها شركات في أماكن مختلفة، تعالوا نستعرضها مع بعض.
Shoe Bakery – 1
الستارت أب دي منتجاتها تستهدف البنات والستات، خصوصًا محبي الحلويات. بس منتجاتهم مش للأكل، تتلبس بس، إزاي؟ الستات والبنات يقدروا يشتروا أحذية وشنط مصنوعة يدويًا بتصميمات مستوحاه من الحلويات؛ يعني لو بتحبي الشكولاتة أو الدونتس هتلاقي شنط وأحذية شكلها كإنها معمولة من الشكولاتة أو الدونتس. مستغربين ومش قادرين تتخيلوا؟ تعالوا نشوف عينة من منتجاتهم في الصورة إللي جاية.
Dirty Rotten Flowers – 2
ناس كتير بتحب الورد، بس مفيش شخص يحب حد يبعت له ورد دبلان أو ميت! الستارت أب دي زي ما هو واضح من اسمها بتعمل ده! لو مضايق من حد أو خطيبتك سابتك، بتدخل على الموقع وتختار من البوكيهات المعروضة وتدخل عنوان المرسل إليه تكتب له رسالة (اختياري) توصل مع البوكيه، وتقدر تطلب إن الرسالة تكون من مجهول بحيث الشخص إللي يوصله البوكيه ما يعرفش مين إللي بعته. الفكرة حزينة وكئيبة، بس موجودة.
Potato Parcel – 3
نبعد شوية عن الحزن والورد الميت وتعالوا نشوف البطاطس! بس بردو البطاطس دي مش للأكل؛ لا ينفع تتقلي ولا تتشوي. لو عايز تبعت رسالة لحد بطريقة مختلفة، زور الموقع واكتب رسالتك (بحد أقصى 130 حرف) وهما هيكتبوها على ثمرة بطاطس وممكن كمان ترفع صورة لو عايز.
غير مسموح بالرسايل إللي فيها تهديد أو كراهية؛ الموقع مش بيسمح بدة وبيلغي الطلب أو بيطلب تعديل الرسالة.
ينفع تاكل البطاطس دي بعد كده؟ لأ، لأن الرسالة مكتوبة بالحبر والشركة غير مسؤولة عن أي أضرار صحية ممكن يسببها أكل البطاطس.
Died In House – 4
أي شخص بيفكر يشتري أو يأجر بيت جديد داخل أمريكا وعايز يعرف لو حصلت أي وفيات في السكن دة (خصوصًا لو الوفاة غير طبيعية بسبب جريمة قتل أو أي شكل من أشكال العنف) بيدخل على الموقع دة
ويكتب عنوان الشقة أو البيت إللي عايز يستعلم عنه، وهيستلم تقرير فيه حالات الوفيات إللي حصلت في مكان السكن وسببها (لو متاح) والحرايق أو أي أشخاص ارتكبوا جرائم جنسية في المنطقة المحيطة. بحسب الموقع، حدوث حالة وفاة بسبب جريمة قتل ممكن يقلل قيمة العقار بحوالي 25% ويزيد الوقت اللازم للبيع أو الإيجار بحوالي 50%. لو بتشتري أو بتأجر بيت، ممكن الحوادث دي تأثر على قرارك ولا ما بيفرقش معاك؟
Dog Spot – 5
مؤسس الشركة دي من محبي الكلاب، والفكرة جاتله من موقف بيواجهه كل ما يحب يروح مشوار أو يشتري حاجة من مكان مش مسموح فيه اصطحاب الكلاب، كان بيضطر يسيب الكلب في البيت لإنه بيخاف يربطه ويسيبه في الشارع لإنه ممكن يتسرق. قرر يعمل أماكن مخصصة للكلاب عبارة عن أكشاك صغيرة على الرصيف موجودة في أماكن مختلفة. المكان بيتحجز من أبليكيشن بينزل على الموبايل وبتقدر تطمن على الكلب عن طريق الكاميرا الموجودة في الكشك دة. مش بس كدة دة، كمان في نظام تكييف وتدفئة ممكن تتحكم فيه، دة غير التعقيم.
دي من أغرب الستارت أبس اللي عارفينها! لو تعرفوا ستارت أبس تانية (أو أغرب من دول)، قولولنا عليهم!
